Eph 4 | VIV | STEP | Tu omi Yaubada gikovami-ma ganagahevagadonemi. Iya deliya hiseku be Kaiwabu faꞋina yogoyogoniku gamimiyami-ma gagahegahevagadonemi be gava dewa Yaubada yana kaliva gilubodadi medede amine wanadewadewa.

a m1Kl 1:10m2Kl 3:12-13m3Lo 12:16-18, 1Fi 3:8m41Ko 12:12-13

b m7Lo 12:3,6m8Sam 68:18m111Ko 12:28m121Ko 14:12

c m13Kl 1:28m141Ko 14:20m15Ef 4:25m16Kl 2:19

d m22-24Kl 3:9-10, Lo 12:2m25Ef 4:15m28Af 20:35

e m29Ef 5:4, Kl 4:6m30Ef 1:13-14m31Kl 3:8m32Kl 3:12-13

Ephesians 4

AluꞋaluwa Mahalina ide Keliso wowona giꞋivesaꞋeyada.

1 Tu omi Yaubada gikovami-ma ganagahevagadonemi. Iya deliya hiseku be Kaiwabu faꞋina yogoyogoniku gamimiyami-ma gagahegahevagadonemi be gava dewa Yaubada yana kaliva gilubodadi medede amine wanadewadewa. 2 Tova moyaꞋaina wananuwanuwahobu be kadu kaliva umaumadiyao amine wanahuluhuluva. WanaꞋatuvefaꞋila, e yami wanuwakabubu tobohiyamiyao wanaꞋatuvefaꞋiledi. 3 WanaꞋitaveꞋavimi be AluꞋaluwa Mahalina giꞋivesaꞋeyami amine, yami nuwanuwa saꞋeyana againe wanamiyami be niwalova ana ala hinagene wanamiyami. 4 Ide Kaiwabu wowona au saꞋeyanaga kadu AluꞋaluwana saꞋeyanaga. Meda anafaiweya gavadi aimo omi faꞋimiya ginaga-ma faꞋina gikovami be walulauboda, medema abalulauboda saꞋeyanaga. 5 Kadu yada Kaiwabu saꞋeyanaga, yada abavetumagana saꞋeyanaga, yada bafitaiso saꞋeyanaga. 6 Kadu moyaꞋaida yada Yaubada saꞋeyanaga ada Tamada saꞋeyanaga, BanaꞋe moyaꞋaida givehimeyeda, yana faiwala moyaꞋaida agaideya gififaisewa, Tauna moyaꞋaida nuwahinagedeya gimimiyami. ^a

Keliso yana abavetala gifolakena be ide wowona kanaveꞋasevatu.

7 MoyaꞋaida kavesaꞋeya tu Yaubada ide saꞋeyana saꞋeyana ginuwadogeda-yo ada vehimeya tulina tulina giveleda, ada medema Keliso yana abavetala Tauna gifolakena amine. 8 Meda Keliso yana folaka faꞋina Veyao Tuwaina ana buki gigahe gigayo,

Wese getane-moꞋane gilaka ana toveya
nibaineyao agaidiya wai ginagona
be yogoyogonidiyao ginauwedi,
ada yana hawahega yana kaliva agaidiya gifolakena.
Hidede amine Yaubada buki-nadi againe gigahe. 9 Yana gahe saꞋeyana “gilaka” ma, gavaimi ana nuwanuwa? Ana nuwanuwa hidede amine. Nagona babi gava dibune gihobuꞋela. 10 Ada Bana gihobuꞋela Kalivai-nadi wese lobama getane-moꞋane gilaka be higa lobama be babi matatabudi Tauna againe ginavemaga-Ꞌowodi. 11 Ada yana abavetala yana yoꞋo agaidiya gifolakena-ma hidede amine. Tufoidi adi vehimeya ma afositolo yadi faisewa, tufoidi Yaubada yana venuwaꞋata gitunevehabalutugidi-ma hinaꞋawatalatalainena, tufoidi kibababala ana venuwaꞋata hinalumamale-dadanena. Ada tufoidi adi vehimeya ma Yaubada yana sifi adi toꞋitaveꞋavina kadu adi tovehawala. 12 Keliso vehimeya medede amine gifolakena be higa mena kalivai-dina yadi faisewa againe Yaubada yana yoꞋogaga hinaꞋihagihagiyeda-yo tovetumagana moyaꞋaida Keliso yana faisewa againe kanaꞋidibumuhiga, ada au Keliso wowona ginatubutubuga. 13 Au hidedemi Keliso wowona ginatubutubuga tu ide yana kaliva yana vevine moyaꞋaida yada vetumagana againe kadu Yaubada Natuna ana halamana againe kananuwanuwa saꞋeyana be kanaveꞋasevatu. E, Bana Keliso nuwanuwa yamumunaga againe gimaga-moꞋa be giveꞋasevatu amine, ide yana nuwanuwa yamumunaga againe kanamaga-moꞋa be kanaveꞋasevatu.

14 KaꞋi mededemi kanaveꞋasevatu amine, aimo keke vaita weꞋoweꞋo yadi nuwanuwa tulina tulina amine kanamiyami. Lefo lakahina waka giluluvilavilana waꞋamine waꞋamine o kaꞋi bolimana ai lukumina gitafitafivilavilana amine, keke vehawala tulina tulina waꞋamine waꞋamine kanamulimuliyeni be kaliva aikaunuwanuwadiyao yadi bonayafayafa againe hinanuwaꞋabiyeda be higa eda tunutunugina kanahegeni. 15 Keke medede amine kanaꞋabinuwanuwa, au yada wanuwanuwa hawahawahegana nuwanuwa velemoꞋena kanagahegaheyeni-yo au yada dewa moyaꞋaina againe Keliso ana itaꞋita amine kanalakalakata, higa Bana uꞋuda. 16 Ada Bana uꞋuda faꞋina, ide saꞋeyana saꞋeyana vaita waloga amine Keliso wowona againe kaveꞋetohavihavida, ada ide waloga saꞋeyana saꞋeyana yada faiwala Keliso uꞋuda againe giꞋelaꞋela be moyaꞋaida buye kaveꞋaveluveluga. Kadu kaꞋi saꞋeyana saꞋeyana yada faisewa tulina tulina kaꞋitaꞋitaveꞋavina amine, wowona matatabuna gitubutubuga gitubutubuga tu ide wowonai-nadi buye kaveꞋahawahawahega-yo taudeyao kakivetubugida be kaveꞋasevatu. ^{b
,} ^c

Keke tomiya-kawokawowo amine wanahuluhuluva, au Keliso

yana kaliva mahamahalimiyao amine wanadewadewa.

17 Tu omi Keliso wowona faꞋina, iya Kaiwabu yana kaliva omi agaimiya Bana matane ganagahe. Badi Yaubada keke hidahalamaneni-ma amine omi keke wanahuluhuluva. Badi gaitoma-kawowo faꞋina tova moyaꞋaina hinuwanuwa, ada tagadi hiꞋivekuluna faꞋina Yaubada hifaniyeni-yo yawai-vagata Bana givetalaiyena-ma keke hidahalamaneni. Au tulidiyao himiyamiyavehaila, ada nuwadi giꞋuyuyu-moꞋa. 19 Nuwadi givewaba be wowomumu ana ayauna keke hidahalamaneni faꞋina, nuwanuwa ayaꞋayafanina againe hivetalaiyedi be yamadada tulina tulina hihuluvidi, keke maꞋita hidaꞋilova.

20 Tu omiꞋiyao ma Keliso againe wasikulu tu ana halamana keke mena dewai-nadi koyo-moꞋena amine wadavaini. 21 Omi velemodi Keliso waꞋitahalamanena ada Bana yana yoꞋo agaidiya waluku-yo vehawala nuwanuwa velemoꞋena Yesu giyemaunena-ma amine wanogalina. 22 Ada vehawala hidede amine wanogalina. Tuwaina aimo keke Keliso againe wadavetumagana ana toveya, taumiyao nuwami ana nuwanuwa koyona dibune wamiyami. Yami nuwalauvadiga gilolomi be wanuwadigadigaga tu gikikivekoyomi. Atu kuvi tubuna giꞋafuwana be bavagu againe gina amine, omi tubumi wanahegena be nuwami ivaguna wanavelakavina. E, wanahawahegemi be Yaubada aseꞋasemi kadu nuwami matatabuna ginakiveꞋivaguna. Ada mena nuwami ivaguna Yaubada Tauna ana itaꞋita yegayegana kadu mahamahalina velemoꞋena amine gibubuna be Bana amine wanahuluhuluva.

25 Tu nuwami ivaguna Keliso amine wanahuluhuluva faꞋina, veꞋalololo matatabuna wanavenikohiyena. MoyaꞋaida yoꞋo saꞋeyana kalivai-dina faꞋina, omi saꞋeyana saꞋeyana tobohiyamiyao agaidiya wanagahe velemoꞋena. 26 Dewa koyona faꞋina wananuwakoyo tu keke wananunauweni be taumiyao wanakoyo. Yami nuwakoyo keke wananunauweni mala ginabogi, au ginamaduhavaina. 27 FaꞋina keke taumiyao ami wanafali wanayauni be Setani ginaluku. 28 Hai kaliva gikikaiꞋafu, medema kaiꞋafu ginaꞋilovena, au ginavebutu ginafifaisewa. E, tauna nimane ginafaisewa hagihagina be higa badi koyokoyo tamo gavadi againe anafaiweya ginanuwakabubuyedi.

29 Kadu wonakoyokoyo keke-moꞋa awamiya ginayemu. Au gahe yamumunaga wanayakayakahina, ada gavadi gavadi tobohiyamiyao gilubodadi, medema wanagahegaheyena be wanakivetoyogidi kadu wanaꞋihagihagiyedi. 30 Ada keke Yaubada AluꞋaluwana Mahamahalina aseꞋuꞋaulolo wanaveleni. Yaubada AluꞋaluwa Mahalina againe gikibwami be higa aimo tova mulina tutuvehobu ana toveya, ami aiyauga-vagata wanavai-Ꞌowona. 31 NuwakoyoveꞋine agodadaga ilaꞋa wanavenikohiyena. Auwe veꞋafaifaina kadu veyaina. Tobohiyamiyao adi kivekoyo ana nuwanuwa matatabuna wanavekwaulaugena. 32 Au buye wanaveꞋanuwakabubu kadu buye wanaveꞋahinekalikali. Ada Yaubada Keliso faꞋine yami koyona givenuwauluyena amine, meda omi tobohiyamiyao yadi koyona wanavenuwauluyena. ^{d
,} ^e